ភ្នំពេញ៖ លោកអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានចុះហត្ថលេខាលើប្រកាសមួយ ស្តីពីការបណ្ដេញចេញពីក្របខណ្ឌមន្រ្តីនគរបាលជាតិ ទៅលើមន្រ្តីនគរបាលចំនួន ១២រូប នៃស្នងការដ្ឋាននគរបាលរាជធានីភ្នំពេញ ដោយក្នុងនោះមានចាប់ពីថ្នាក់ព្រិន្ទបាលទោ រហូតដល់វរសេនីយ៍ទោ។
ក្នុងប្រកាសលេខ ០២២ ប្រក ចុះថ្ងៃទី០៣ ខែមករា ឆ្នាំ២០២៤ នេះ គេសង្កេតឃើញមានមន្រ្តីនគរបាលជាតិ ១២រូបនៃស្នងការដ្ឋាននគរបាលរាជធានីភ្នំពេញ ត្រូវបានសម្រេចដកហូតមុខតំណែង ឋានន្តរស័ក្តិ និងបណ្ដេញចេញពីក្របខណ្ឌមន្រ្តីនគរបាលជាតិ ដោយមូលហេតុល្មើសវិន័យរបស់កងកម្លាំងនគរបាលជាតិ។
កន្លងមក ក្រោមអាណត្តិថ្មីនៃការដឹកនាំក្រសួងមហាផ្ទៃដោយលោកឧបនាយករដ្ឋមន្រ្តី ស សុខា គេក៏ធ្លាប់មានការអនុវត្តនូវរូបភាពបណ្ដេញចេញពីក្របខណ្ឌនគរបាលជាតិទៅលើមន្រ្តីមួយចំនួនដែលពាក់ព័ន្ធនឹងគ្រឿងញៀន ក៏ប៉ុន្តែការសម្រេចបណ្តេញមន្រ្តីនគរបាលនៃស្នងការដ្ឋាននគរបាលរាជធានីភ្នំពេញលើកនេះ គេពុំដឹងថាមកពីមូលហេតុអ្វីនៅឡើយ ដោយក្នុងប្រកាសខាងលើបញ្ជាក់ត្រឹមតែជាការ "ល្មើសវិន័យរបស់កងកម្លាំងនគរបាលជាតិ"៕
